Jabuuti,(insidesomalia.org)- Ciidamo kala taabacsan Dowladaha Jibouti iyo Eritrea ayaa maalintii labaad waxay ku dagaalamayaan xadka laba dal u dhaxeeya, gaar ahaan halka la yiraahdo Ras Doumeira oo Waqooyi Bari kaga toosan Dalka Jibouti.

Dagaalkan oo bilowday kadib markii ay dhinaca Jibouti soo galeen Saraakiil iyo Ciidamo dhinaca Eritrea ka soo goostay, isla markaana ay Ciidamada Eritrea oo soo dabagalay ay rasaas u fureen dhinaca Jibouti ayaa waxaa lagu soo waramayaa in uu maanta si xooggan u socdo.

Wararka laga helayo dhinaca Jibouti ayaa waxay sheegayaan in uu soo gaaray khasaare la eg 2 dhimasho ah iyo 20 dhaawac ah, iyadoo aan ilaa iyo haatan aan war ah laga heynin dhinaca Eritrea oo ku saabsan khasaaraha dagaalka ka soo gaaray.

Ciidamada labada Dowladood ayaa in muddo ah waxay isku horfadhiyeen xadka labada dal, iyadoo labada Dowladoodna ay sheegeen in ay Ciidamada xadka ka jooga difaac ku jiraan, isla markaana aysan weerar ahayn.

Labada Dowladood ayaa waxay Ciidamadooda horay u dagaalameen labo jeer oo hore kadib markii ay Mas’uuliyiinta labada Dowladood isweydaarsadeen eedeymo ku saabsan in ay midba tan kale ku xadgudbeyso.

Madaxda Dawladda jabuuti ayaa waxay wacad kumareen in ay difaaci doonaan sharafta iyo karaamada shacabka reer jabuuti iyo Dalkooda intuba, wasiirka Gaashaan higa jAbuuti ayaa sheegey in Dowladda Eritrea ay ku soo gardarootey ayna iska difaaci doonaan.